og börnin þau
grétu og grétu
af því að seríósið var búið
af því að seríósið var búið aaaaaaaaaúúúú
fyrst var ekkert
svo komst þú
á vængjum yfir
flóann
Ég er blá því mamma er farin. En mamma kemur aftur. í júní. Með allar systur sínar og fullt af frænkum. Og lífið er fallegt. Og ég svíf á vængjum yfir flóann á hverri nóttu. Fer tólf spor í sund. Fer ferðir um alnetið þar sem fólk hittist og hjálpar hvert öðru eins og fólki er von og vísa. Og fylgist með gengi Kate Moss (eða Boss?) hjá JPV. Og allt hitt.
Netið heldur áfram þó maður aftengist í nokkra daga. Það er nú aldeilis gott.
Lifið í friði.
bara
Bara láta vita að hitinn var 25 í gær, ekki 20.
Þetta er ekki til að núa ykkur neinu um nasir, bara vegna þess að eins og allir góðir Íslendingar gerðu á árum áður, held ég veðurdagbók. Hér á blogginu.
Vorið, þegar það kemur loksins, kemur með trukki og dýfu.
Gott að vera til. Núna, ekki þá.
Gott
Got
Go
G
Og mamma mín er að koma.
Lifið í friði.
í dag
Í dag er ekki í fyrsta skipti sem ég dæsi yfir lestri fyrrverandi kennara og pirra mig á því að hann skuli einmitt vera fyrrverandi.
Í dag er ekki í fyrsta skipti sem ég hvæsi yfir lýsingum á meðferð gangandi vegfarenda í Reykjavík.
Bloggrúnturinn var fínn, mæli með Málbeini og Hirti Frjálsa.
Í dag mun ég í fyrsta skipti á þessu ári fara berfætt í sandölum að sækja Sólrúnu í skólann. Úlpur, húfur, treflar og vettlingar snarmisstu vinnuna við það að íslendingar fóru í kröfugöngu í gær. Og kannski höfðu bænirnar áhrif líka. Hér er a.m.k. 20 stig og glampandi sól. Ligga ligga lá. Hí á ykkur. Gefur augaleið reyndar að veðrið batni einmitt núna því mamma er að koma á morgun. Og þegar mamma fer í frí, skín sól á hana. Hvert sem hún fer í frí.
Lifið í friði.
paranoja?
Ég rændi myndinni af einhverri hersíðu í gær og nú er ég allt í einu með ranghugmyndir um að þeir geti rakið hana og ég verði undir eftirliti og... æ, skiptir svo sem ekki miklu, erlendar leyniþjónustur hafa lengi fylgst með mér.
Lifið í friði.
skriðdreki
skriðdreki
Originally uploaded by parisardaman.Til sölu skriðdreki. Eyðir miklu en er góður farkostur. Drífur brekkur, kemst inn tiltölulega þröngar götur þar sem illa lagðir bílar, gangstéttar og annar ósómi er aldrei fyrirstaða.
Verð skv. samkomulagi.
svarið
Svarið við því hvað myndirnar eiga allar sameiginlegt er að þær voru teknar upp á þeim stöðum sem atriðin gerast í. Fullt fullt af myndum hafa verið gerðar í stúdíóum þar sem líkt er eftir stöðum í París.
En nú ætla ég að horfa á upptöku frá Páskadegi á þættinum mínum, "arrêt sur images", sem fjallar víst um Berlusconi, þann mæta mann.
Börnin eru komin með páskaungana, snuddur (fyrir þá sem enn nota slíkt), prinsessur og bækur upp í rúm og tilbúin á góðri leið inn í draumalandið sitt sem er vonandi laust við álver.
Rauðvínið í glösum hjónanna er vínrautt. Ekki rautt. Skrýtið?
Lifið í friði.
undarleg viðskipti
Fyrir nokkrum dögum kom kona með þunga bók í töskunni sinni til mín. Þessa bók las ég nú um helgina enda hvílíkt skítaveður að það var fínt að kúra sig undir sæng á eftirmiðdögum og lesa.
Inni í höfðinu á mér ómuðu stundum reiðiöskur, stundum var ég svo hissa að ég trúði varla orðunum, stundum þurfti ég hreinlega að leggja bókina frá mér og hefði kannski bloggað eitthvað til að fá útrás en í staðinn básúnaði ég yfir vesalings Frakkana yfirlýsingum um náttúruverndun, stóriðjubaks og tímaskekkju og þau vissu varla hvaðan á þau stóð veðrið.
Í morgun hjólaði ég af stað með þungu bókina í bakpoka. Hjólaði niður með skipaskurðinum sem liggur annars vegar niður til Parísar og hins vegar upp til Amsterdam (sú leið er sjaldnar notuð af mér). Á Quai de la Loire hitti ég, regnbogabarn í rauðum jakka, svartklæddu íðilfögru ljóshærðu nornina sem notar stundum eldrauðan varalit. Upp úr svarta pokanum hennar kom Love Star, upp úr mínum vínrauða kom Draumalandið. Andri Snær Magnason var því staddur þarna að einhverju undarlegu leyti, óforvarendis og án þess að vita af því var hann á terrössu við canal í París að morgni sumardagsins fyrsta. Hann fékk þó ekki myntute hjá arabakarlinum og ekki var lesið upphátt úr bókunum.
Ég veit það núna að ég ætla að gera eitthvað til að vinna að því að ekki bara bókin endi vel.
Einhverjar hugmyndir?
Ég held því miður að Íslandsferð í júlí sé ekki valmöguleiki vinnunnar vegna. Það er þó ekki alveg útilokað og mig langar ógurlega mikið að vera þarna við Kárahnjúka 21. júlí nk. Þar verða líklega sömu listamenn og á tónleikunum í janúar en ákveðið hefur verið að auglýsa engin nöfn svo fólk komi ekki bara til að dýrka stórstjörnur, það væru rangar forsendur.
Hægt að lesa um þetta á savingiceland.org sem ég þarf að bæta í tenglalistann. Hvert á maður helst að senda peninga? Þangað? Eða eitthvert annað?
Það þýðir ekki lengur að hugsa með sér að aðrir geri þetta fyrir mann.
Við þurfum öll að gera þetta saman.
Mikið er ég nú fegin að enginn vina minna talar um tegrun eða jaðarábata þegar sagt er frá djammferðum eða pælt í lífshamingju. Mikið er ég hissa á að hafa aldrei heyrt um star.is. Mikið er ég glöð að þessi bók var skrifuð.
Ég ætlaði ekki að játa það, en ég get aldrei haldið í mér: Ég grét meðan ég las síðustu tvær blaðsíðurnar.
Gleðilegt sumar hróin mín.
Gleðilegt og gott sumar, verið ánægð, verið bjartsýn, það er ég.
Og umfram allt: Lifið í friði.
sveitaferð
Ég ætla að leyfa spurningunni um hvað myndirnar 16 eigi sameiginlegt að hanga ósvaraðri yfir páskana. Sjálf verð ég út úr síma- og netsambandi í 4 daga.
Í fyrsta sinn munum við hafa páskadagsmorgun eins og frönsk börn eiga að hafa hann, eggin verða falin úti í garði og þau leita.
Vitanlega er búið að færa þennan sið upp á hærra plan og nú eiga foreldrarnir að búa til ægilega skemmtilega ratleiki utan um páskaeggjaleitina. Við ætlum hins vegar að skýla okkur bak við það hvað börnin eru ung og látum duga að fela eggin og ekkert allt of vel heldur.
Ég er sammála Kókó um að páskarnir eru eitt besta fríið, einhvern veginn svo þægileg tilhugsun að þessir frídagar eru þarna alltaf og koma engu dagatali við. Þó að páskafríið sé náttúrulega bara mánudagurinn hér fyrir vinnandi fólk eru börnin í 2 vikna skólafríi og mörgum tekst að lengja fríið sitt, þökk sé 35 stunda vinnuviku o.fl.
Ég get upplýst ykkur um það að ég hef eingöngu séð helminginn af myndunum úr spurningakeppninni, a.m.k. svo ég muni.
Ég óska ykkur gleðilegra páska, hvort sem þið gangið til altaris eður ei. Megi friður og hamingja fylgja samverustundum við fjölskylduna.
Mig langar í lambalæri með öllu à la mamma einmitt núna en mun láta mér duga að veðurguðirnir gefi okkur þurra helgi og hlýja.
Lifið í friði.
björt ljós, borgarljós
Já, það getur verið varasamt að taka þátt í leik í stórborginni. Eyja liggur í rauðvínsvímu í kókómjólkurpolli, Björn Friðgeir er kominn í svaðið á Pigalle...
Leikar fóru þannig að Erna sigraði með miklum yfirburðum, hlaut 4 óperuhús Garnier.
Aðrir voru með 1-3 minnismerki.
Enn hefur síðustu aukaspurningunni þannig að spurningin er hver fær afréttara á þessum heilaga degi. Sem er ekkert heilagur hér í kaþólska Frakklandi, hér er ekkert frí nema á 2. í páskum. Föstudagurinn ógurlega langi á Íslandi er bara venjulegur vinnudagur hér. Sem og skírdagur.
Þess vegna er ég stokkin í vinnuna.
En fyrst eru það tvær lokaspurningar frá mér:
Hvað eiga þessar myndir sem spurt var um sameiginlegt?
Hvað hefur Parísardaman sjálf séð margar þeirra?
Lifið í friði og varist váljósin borgarinnar í fríinu.
til allrar
Já, það var hún Hugrún sem kom með svarið, skyldi þetta vera Huxy eða einhver önnur Hugrún?
Hún er a.m.k. komin með eitt stykki Saint Germain des Près kirkju í stig fyrir Ronin e. John Frankenheimer frá 1998.
Og það sem í mínum einfalda huga greindi Pompidou frá hinum forsetunum var að hann var bókmenntafræðingur en ekki útskrifaður úr stjórnmálafræðum eins og flestir hinna. Gleymdi náttla stofnanda 5. lýðveldisins, DeGaulle sem var ekki með háskólapróf...
16. og síðasta spurningin er: Í hvaða mynd sjáum við Matt Damon taka George-Pompidou hraðbrautina sem liggur meðfram Signubökkum í öfuga átt til að sleppa undan löggunni sem eltir hann?
Og aukaspurningin er: þessi George-Pompidou hraðbraut skiptir um hlutverk í einn mánuð á ári, í hvað breytist hún?
Lifið í friði.
frantic
er kannski ýkjur á lýsingu á ástandinu í leiknum, en nú kom nýr keppandi fram með rétta svarið. Frantic eftir Polanski frá 1988.
Matti fær 1 glerpýramída.
Ég á að vera að skrifa leiðarlýsingu á sérferð og finna góðar búðir fyrir efnaðar konur en mér gengur ekkert með það, enda tekur keppnin alla mína athygli í augnablikinu.
15. Í hvaða mynd sjáum við Robert DeNiro taka hraðbrautina sem umkringir París í öfuga átt til að ná öðrum bíl?
Aukaspurningin er hvað greinir Pompidou frá öðrum forsetum 5. lýðveldisins?
Lifið í friði.
jæja
Það var Björn Friðgeir sem nældi sér í þriðju Notre Dame dómkirkjuna.
Ég hló dátt að tilhugsuninni um drenginn sem söng A wife to kill í úbartið.
Myndin er A view to a kill e. John Glen frá 1985. Á frönsku heitir myndin Dangereusement vôtre.
Grace Jones var ekki á Palace, hún stundaði Bains Douches diskótekið. En þið fáið öll rauðvín þó að mér finnist nú sumir verða dálítið kærulausir í sullinu.
En áfram með besta smjörið í heiminum:
14. Í hvaða mynd sjáum við Harrison Ford sleppa naumlega undan byssukúlum í bílastæðinu undir Beaubourg?
Aukaspurningin er auðvitað hvað er Beaubourg og hvert er hitt nafnið?
Lifið í friði.
superman
Súpermann gerði leikinn æsispennandi eins og hans var von og vísa. Ég hélt nefninlega í smá stund að Eyja væri að auka forskotið en þá kom Erna inn og gerði mér grein fyrir að Eyja hafði gleymt mikilvægu smáatriði.
Erna fékk bæði óperubyggingu og rauðvínsglas. Myndin var sem sagt Superman II e. Richard Lester frá 1980 og lyfta kom strax í Eiffel, í maí 1889. Sem er áhugavert í ljósi þess að ég bý á 5. hæð án lyftu og þó er húsið mitt byggt 1960. Sumt stendur dálítið í Frökkunum eins og t.d. að aðgengi veikbyggðara fólks að heimilum sínum þykir ekki nauðsyn.
Svona stendur leikurinn:
Eyja: 3 Sigurbogar
Ghrafn: 3 Eiffelturnar
Björn Friðgeir: 2 Notre Dame
Erna: 3 Opera Garnier
Gummi Gvendarbrunnur: 1 Sacré Coeur
Svo eru nokkur rauðvínsglös ofan í Eyju, Ernu, Hildigunni, Farfuglinum og Ghrafni. Og Björn er með fjöður dansmeyjar úr Rauðu Myllunni í hatti sínum.
13. Í hvaða mynd stekkur Grace Jones úr Eiffel-turninum í fallhlíf?
Aukaspurningin er: Hvaða diskótek stundaði sú díva í París á 9. áratugnum?
Lifið í friði.
et encore...
Það er naumast fjörið. David Niven var vitanlega að fara umhverfis jörðina á 80 dögum í mynd eftir Michael Anderson frá 1956. Og auðvitað sá ég Subway með vinum mínum úr barnaskólanum. Mmm hvað Christophe var sætur... þá.
Eyja er búin að jafna leikinn milli hennar og ghrafns. Og komin á annað rauðvínsglasið. Mig langar nú að bjóða Hildigunni eitt líka fyrir að koma með nýja hugmynd, einmitt svona á að leika sér.
Næsta spurning er svo auðveld að það tekur sig varla að spyrja.
12. Í hvaða mynd stoppar Christopher Reeve lyftuna í Eiffelturninum með berum höndum?
Aukaspurningin er þá hvenær kom lyfta í Eiffelturninn?
Lifið í friði.
Encore encore...
Og getraunin heldur áfram, spurningarnar eru 16 alls upp úr bókinni en svo verða tvær spurningar í lokin frá mér.
Gvendarbrunnur er kominn með eina Sacré Coeur (hvíta kirkjan á Montmartre) fyrir French Kiss eftir Lawrence Kasdan frá 1995.
Le Train Bleu veitingastaðurinn er notaður í blóðugri byrjun Nikita e. Luc Besson.
11. Í haða mynd sést David Niven taka hestvagn fyrir utan gare du Nord lestarstöðina?
Aukaspurningin gæti t.d. verið hvaða mynd e. Luc Besson sá ég fyrst á Íslandi með vinum mínum úr Seljahverfinu, líklega 16 ára gömul, og þau voru gáttuð í marga daga yfir því að hafa séð franska OG góða mynd?
Lifið í friði.
Forystan i Noregi
Ghrafn hefur náð forystu og er með þrjá Eiffelturna.
Myndin er hin drepleiðinlega Prêt-à-Porter e. Robert Altman frá 1994.
Aukaspurningunni um hvað varð um steinana úr Bastillunni var ekki svarað. Steinarnir voru notaðir í brúna frá Concorde-torginu (þar sem fallöxin stóð lengst í byltingunni) yfir í þinghúsið. Það þótti vel við hæfi að traðka á gamla fangelsinu til að komast í þingið.
10. Í hvaða mynd sjáum við Kevin Kline ræna tösku af Meg Ryan á Gare de Lyon lestarstöðinni?
Aukaspurning: Hvaða franska mynd hefst á atriði á frægum veitingastað á þessari sömu lestarstöð?
Svar til Gísla út af orðabelg hér neðar: Ég mun bráðlega skrifa pistil um það hvað "slæðukona" er.
Lifið í friði.
allir jafnir
Þau fjögur sem hafa náð að svara aðalspurningum eru öll jöfn með tvö minnismerki hvert. Eins og bent er á í orðabelg hér að neðan, er leikurinn æsispennandi og um að gera að vera tengdur til að ná að fylgjast með. Heimspekingur missti t.d. óvænt af tækifæri til að komast fram úr hinum keppendum þegar kókómjólk var hellt yfir gólfið af barni hennar. Sem betur fer gat ég gefið henni rauðvínsglas til að róa taugarnar. Hvað gerðu húsmæður áður en rauðvínið varð til?
Myndin er Charade e. Stanley Donen frá 1963.
Aukaspurningunni var ekki svarað, það hentar mér ágætlega að halda henni því ég á að vera að vinna mikið núna.
9. Í hvaða mynd sjáum við Kim Basinger í hlutverki sjónvarpsfréttakonu fyrir framan pýramídann í Louvre?
Lifið í friði.
smá athugasemd
Var að átta mig á því að aukaspurninguna með nr. 6 mátti misskilja, en hún snerist um að Frakkar elska Woody mest af öllum þjóðum, hann segir það sjálfur. Hér fær hann mestu athyglina og virðinguna. Og þaðan kemur endirinn á Hollywood ending.
Lifið í friði.
allt brjálað
Erna kom með bæði svörin. Og Eyja sver að hún hafi verið á sama tíma. Þar sem ég hef enga ástæðu til að véfengja hana, fær hún rauðvínsglas í sárabætur.
Erna er hins vegar komin með eina gamla óperubyggingu í stig.
Myndin er Paris when it sizzles e. Richard Quine frá 1963.
Bastilludagurinn dregur nafn sitt af því að byltingin hófst 1789 með niðurrifi Bastillufangelsisins. Ég vann lengi á veitingastað við torgið og oft komu ferðalangar að leita að fangelsinu.
Fyrir Björn Friðgeir heldur bókin áfram með Audrey Hepburn, sem er óneitanlega fallegri að horfa á en Monsieur Allen, það mun líklega enginn vilja deila við hann um það.
8. Í hvaða mynd sjáum við sem sagt Audrey og Cary Grant horfa á brúðuleikhús á Champs Elysées?
Aukaspurningin er hvað varð um steinana úr Bastillukastalanum sem var rifinn niður í júlí 1789?
Lifið í friði.
ussusvei
Ég vissi ekki þá og veit ekki enn hvort ég ætti að hlæja eða gráta þegar ég heyrði þessa sögu um daginn:
Kona stýrir deild á stórum vinnustað í Reykjavík. Hún hefur nú í töluverðan tíma átt í mestu vandræðum með að fá fólk í vinnu, enda launin smánarleg á þessum tiltekna stað.
Um daginn var henni sendur nýr starfsmaður sem hún neitar að taka við. Hvers vegna? Nýi starfsmaðurinn er, eins og yfirmanneskjan orðaði það, "slæðukona".
Lifið í friði.
sviptingar
Það var nú meira svarflóðið þarna.
Þetta fór þannig að ghrafn fær annan Eiffelturn fyrir spurninguna sjálfa og Erna E. fær rauðvínsglas fyrir aukaspurninguna. Hstef var reyndar með helming svarsins við henni en það dugar ekki til.
Aukaspurningin var auðvitað lokahnykkurinn á þáttöku Woody í þessum leik og snúum við okkur nú að öðrum stjörnum um leið og við þökkum honum meðfylgdina.
7. Í hvaða mynd kyssast Audrey Hepburn og William Holden milli gosbrunnanna á Trocadéro-torginu undir flugeldalýstum himni 14. júlí hátíðahaldanna?
Aukaspurningin er hvað heitir þjóðhátíðardagur Frakka, 14. júlí, öðru nafni?
Lifið í friði.
getraunin heldur áfram
Eftir fimm spurningar og tvær aukaspurningar er Eyja með 2 Sigurboga, ghrafn með 1 Eiffel og Björn Friðgeir með 2 Notre Dame. Björn fær fjöður úr höfði dansmeyjar á Rauðu Myllunni fyrir að gúggla ekki.
Farfuglinn er með eitt rauðvínsglas fyrir að svara annarri aukaspurningunni.
Hinni var í raun ekkert svar við svo það er hundaskítur.
6. Í hvaða mynd dansa Goldie Hawn og Woody títtnefndur Allen saman undir Tournelle-brúnni (sem er sem sagt enn og aftur við Signubakka, merkilegt hvað Kaninn er upptekinn af þessari sprænu)?
Aukaspurningin er: Hvaða land elskar Woody Allen mest og í hvaða mynd notar hann þá staðreynd í endahnút myndarinnar?
Lifið í friði.
Spurning 5
Númer 3 var Irma la Douce e. Billy Wilder frá 1963.
Númer 4 var Interview with a Wampire e. Neil Jordan frá 1994. Ég bjó í París meðan á tökum stóð, en missti alveg af því að hitta Brad og Tona. Líf mitt væri líklega annað í dag ef þeir hefðu hitt ParísardömuNA.
Spurning númer 5: Í hvaða mynd sálgreinir Peter Sellers Woody Allen á Signubökkum að nóttu til?
Ég hefði nú eiginlega frekar viljað hitta þá kauða en hina tvo, mun flottari gæjar.
Lifið í friði.
4. spurning
Í hvaða mynd hittast Brad Pitt og Antonio Banderas að nóttu til á Signubökkum?
Og hvar í fjandanum var ég þá?
Lifið í friði.
maðurinn sem tengdi
Maðurinn sem tengdi saman fyrsta kjarnorkukafbátinn, róandi lyfið (ég sagði þunglyndislyf, en í frönsku þýðingunni er talað um róandi lyf, þar kemur kannski ósættið við Wikipedia?) og litasjónvarpsútsendingar er Nick Tosches (eins gott að ég beið því ég mundi ekki eftirnafnið en var viss um að fornafnið væri Philip). Nick Tosches skrifaði sem sagt bókina "Unsung heroes of rock'n'roll: the birth of rock in the wild years before Elvis". Fyrsta útgáfa er 1984 og svo endurbætt útgáfa 1991. Þessi hugleiðing um tengingar kemur fram í inngangi höfundar. Lyfið var Miltown, kafbáturinn Nautilus og sjónvarpstækið RCA.
Ég hef ekki lesið alla bókina, bara gripið niður í hana, á frönsku, virðist góð. Það er kallinn minn sem er aðdáandi.
Maðurinn sem gengur angurvær um Tuileries garðana í París er persóna í myndinni "The Age of Innocence" e. Martin Scorcese frá 1993.
Það var Dan Brown sem setti hugleiðingar um uppruna nafnsins á görðunum fremst í "Da Vinci lykilinn" og var gagnrýndur fyrir að setja þetta fram sem heilög sannindi þó að aðeins sé um kenningu að ræða.
Kenningin er sú að þetta komi frá orðinu tuile sem eru þaksteinarnir (tígulsteinar á íslensku?) og gætu hafa verið unnir úr jarðveginum á þessu svæði við Signubakka einhvern tímann.
Bókin var tekin og tætt niður hérna í Frakklandi fyrir ýmiss konar svindl og hagræðingar. Það fannst mér dálítið fyndið, hef aldrei skilið þá sem tóku þessa bók alvarlega á nokkurn hátt. Ég las hana af augljósum ástæðum, það var sífellt verið að spyrja mig hvaða kirkja, hvaða gata, hvaða leið var farin og ég sá að ég yrði að drífa mig að lesa söguna. Hún er fín afþreying, eins og skítsæmileg bíómynd, mér finnast svona pælingar alveg eiga rétt á sér, og markaðssetningin var gífurlega vel heppnuð, ótrúleg reiði sem vall upp hér vegna hennar.
Spurning 3 í kvikmyndagetrauninni, þessi er frekar auðveld, held ég (ekki það að hinar hafi verið erfiðar, líklega allt of auðvelt að gúggla svona spurningum, en ég er auðvitað að þessu til að auglýsa myndir sem gerast í París, ekki að hanka á ykkur lesendum).
Í hvaða mynd kemur Jack Lemmon upp úr Signu og skríður rólega upp á bakkann undir augnaráði steini lostinna lögreglumanna?
Lifið í friði.
getraun II
Parísarkvikmyndagetraun. Ég fæ þessar upp úr lítilli bók með leikjum um París, Paris en Jeux e. Michel Clavel, útg. Parisgramme.
Fyrsta spurningin var í hvaða mynd Fred Astaire syngur á Champs Elysées. Hann gerir það í myndinni "Drôle de Frimousse" eða "Funny Face" e. Stanley Donen 1957.
2. Í hvaða mynd sjáum við Daniel Day-Lewis vafra angurvær um Tuileries-garðana?
Aukaspurningin verður þá að vera: Í hvaða bók er nafnið á Tuileries-görðunum útskýrt á vafasaman máta?
Þessi leikur er fyrir okkur sem erum ekki bara í tölvunni í vinnunni á virkum dögum.
Lifið í friði.
sjùonvqrp
Eina ástæðan fyrir því að á þessu heimili er haldið sjónvarpsloftneti og áskrift að Canal+ eru íþróttir.
Maðurinn minn fylgist af miklum áhuga með rugby og hefur áhuga á "mikilvægum" fótboltaleikjum. Ef ekki væri fyrir íþróttir, værum við sammála um að vera ekki með tengingu við loftnet.
Ég horfi núna á "Without a trace" á sunnudagskvöldum og hef gaman af. En það er ekkert sem ég gæti alls ekki misst af.
Annars felst aðalnotkun sjónvarpsskjásins í að horfa á upptökur, jú stundum úr sjónvarpsdagskrá, en oftast nælum við okkur í myndir á bókasafninu eða hjá vinum.
Undanfarið höfum við verið að horfa á "Friends" aftur, byrjuðum á Íslandi um jólin vegna þess að fyrsta serían lá þar fyrir okkur og erum búin að fikra okkur upp í 7. seríu. Þrykkjugóðð afþreying.
En mikið er ég alltaf jafnhissa þegar ég lendi inn í sjónvarpsdagskránni meðan verið er að skipta um spólu. Er til fólk hér í Frakklandi sem horfir á þetta drasl sem verið er að bjóða upp á kvöld eftir kvöld?
Lifið í friði.
p.s. titillin er sjónvarp skrifað á franska lyklaborðið.
hvernig
Hvernig á að vekja barn sem sefur svo vært að það tók mig dágóða stund að finna hann í rúminu?
Lifið í friði.
um og varðandi
Ég þoli það ekki lengur að lenda inn á nýjum bloggum. Eiginlega er ég hætt að elta nýjar slóðir og læt mér þessar allt of mörgu þekktu slóðir duga. En stundum villist maður óforvarendis í gegnum skemmtilegt komment eða ábendingar og sér að þarna er enn ein fín manneskja sem vert væri að kynnast nánar. Hvað eru eiginlega margar manneskjur sem vert er að kynnast í þessum heimi? Ég sem hélt að fólk væri bara fífl! Greinilega ranghugmyndir hjá mér.
Ég er búin að spá mikið í það hver má og hver á að tala um hluti eins og t.d. femínisma. Mér finnst ég hafa rétt á því að tjá mig eitthvað um það, en ég er alls enginn sérfræðingur, hef lesið allt of fáar bækur, einhvern slatta af greinum og nenni ekki einu sinni að fylgjast með íslensku síðunum um þessi mál. Ekki það að ég hafi ekki áhuga á þeim, ég bara hef ekki tíma til þess, svo mikið annað að lesa og fylgjast með.
Í raun og veru finnst mér ákveðinn kostur fylgja því hvað fólk er óhrætt við að tjá sig um hluti án þess að vera sérfræðingar á Íslandi. Hef oft dáðst að þessum eiginleika Íslendinga að hafa skoðanir á mörgu og misjöfnu. Þó að vitanlega geri ég mér grein fyrir því að skoðanirnar byggja oft á mjög yfirborðskenndri þekkingu og eru þar með kannski ekki alveg marktækar.
En mér finnst það t.d. allt í lagi að vita hvar við femínistar höfum konur eins og Svövu, þá er ég ekki að setja hana í neinn ákveðinn hóp (ljóska, pæja...), heldur að meina að hún er áberandi í þjóðlífinu, hefur verið það lengi og flestir vita hver hún er. Ég veit ekki hvað ég var gömul þegar ég vissi fyrst hver þessi kona var og enn heyri ég af henni þó ég hefði líklega alls ekki gert það einmitt núna nema af því Rafaugað fór að tala um hana.
Það getur ekki verið annað en kostur fyrir femínista sem vinna að jafnréttismarkmiðinu að geta svo auðveldlega fundið púlsinn á stöðu femínismans í þjóðfélaginu. Það hlýtur að hvetja þær til dáða að sjá að enn eru konur að misskilja orðið, enn er þessi klifun á reiðu konunni til staðar. Jú, ein bloggkona heldur því statt og stöðugt fram að slíkar konur séu til, en ég vil meina að þær séu mýta, a.m.k. alls ekki eins margar karlhatarar eins og ætla mætti af hræðslu fólks við femínismann. Enda gat konan umrædda ekki nefnt eina einustu. Ef einhver getur það, er það velkomið í athugasemdir hjá mér. Nefnið einn ofurfemínista, konu sem hatar karlmenn og vinnur ekki að "eðlilegu" jafnrétti, heldur að "ofrétti" kvenna.
Annars er föstudagur í dag, sól í París og helgi framundan. Helgi Draumalands, góð vinkona á ferð um borgina, kannski smá sveitaferð á sunnudag með krakkana.
Ég átti alltaf eftir að svara spurningunni um hvaða karl vildi meina að tengls væru milli þunglyndislyfja og litasjónvarpsins. En nú finn ég ekki greinina sem ég gekk frá í tiltektarkasti um daginn. Get ekki munað hvernig eftirnafnið er skrifað. Svara þessu um helgina en kem hér með nýja getraun:
Í hvaða kvikmynd syngur Fred Astaire á "fegurstu breiðgötu í heimi" Champs Elysées?
Lifið í friði.
draumaland og hatur
Ég er búin að lesa svo mikið fallegt um bókina "Draumalandið" að ég hálfkvíði því að lesa hana.
Hún kemur til mín með vél Fluglei... nei ég meina FL Gr... nei, ég meina ... æ ég man ekkert hvað ég meina.
Hún kemur til mín með beinu flugi á laugardaginn. Ásamt fleiri góðum bókum því ég ákvað að vera sniðug og pantaði nokkrar aðrar með burðardýrinu.
Bókakaup á Íslandi eru svona dæmigerður hlutur sem maður getur ekki leyft sér eftir tveggja vikna frí þar með fjölskylduna. Þá er maður búinn að eyða svo miklu í sundkort, pylsur, kókosbollur, súkkulaðibolla og vöfflur að maður þorir ekki að stinga nefinu inn í bókabúð. En að láta annan gera þetta fyrir sig úr fjarlægð svona rétt eftir borgunardag er hins vegar fínt plan.
Ég hef séð einhverja bloggara spyrja sig hvort ráðamenn lesi bókina. Ekki veit ég hvort höfundur sendi einhverjum þeirra áritað eintak, mér hefði þótt það við hæfi. Það rifjaðist upp fyrir mér að þegar myndin "La Haine" eða "Hatur" kom út í Frakklandi horfðu þingmenn og forseti á hana í sérstakri forsýningu og gátu því ekki látið sem þeir vissu ekki af henni. Myndin fjallaði um úthverfavandamálin og vitanlega hefur lítið gerst í lausn mála fólksins sem situr fast í lægsta stigi þjóðfélagsins þó að ráðamenn hafi horft á bíómynd um það. Það sást glöggt í haust að hiti er í kolunum á þessum svæðum.
Ég held að það geti bara ekki verið að íslenskir stjórnmálamenn lesi ekki bókina. Hins vegar er annað mál hvort þeim beri einhver skylda til að svara henni. En að mínu mati ber blaðamönnum a.m.k. skylda til að krefja þá svara við spurningunum sem bókin veltir upp.
Lifið í friði.
heilinn minn
Á neðstu hæðinni í blokkinni búa gömul hjón, indæl og hjálpfús. Þau hafa m.a. tekið að sér það verkefni að dreifa póstinum í póstkassana og svo eru þau sjálfskipaðir dyraverðir, glittir iðulega í þau úti í glugga þegar maður er að leita að lyklunum í töskunni og stundum koma þau fram á gang til að spjalla, kallinn vill endalaust tala ensku við mig og börnin, en það er allt önnur saga.
Um daginn kom ég heim um hádegisbilið og hafði þá pósturinn komið með pakka, stórt og feitt umslag, til mín sem þau höfðu veitt móttöku eins og þau gera iðulega til að spara manni ferð á pósthúsið. Samt var tilkynning um stórt umslag í sjálfum póstkassanum. Ég gerði ráð fyrir að pósturinn hefði verið búinn að gera tilkynningu og stinga henni í kassann en geymdi nú samt þessa tilkynningu því einhver efi leyndist í djúpum huga míns. Eftir að hafa horft á þessa tilkynningu í nokkra daga tók ég hana upp og reif hana en henti henni ekki.
Svo var ég í bílnum og þar hugsa ég og áttaði mig á því að ég var að bíða eftir öðru umslagi, frá Eimskipum, sem, eins og ég sagði ykkur á dögunum, lesa bloggið mitt og vorkenndu mér yfir dagatalavandræðum og ákváðu að senda mér dagatal.
Í dag fór ég með rifinn miðann á pósthúsið og nú prýðir undurfagur Tjaldur á steini vegginn hér við skrifborðið mitt.
Takk Eimskip. Takk M.
Stundum er ég hreinlega skíthrædd við það hvað heilinn í mér er hæggengur. Alzheimer light?
Lifið í friði.
íbúð til leigu í París
Þar með er fyrsta íbúðarauglýsingin komin á www.parisardaman.com
Reyndar vantar verðið, en það er í athugun. Get lofað því að það verður ekki ósanngjarnt.
Minni bæði alla ferðalanga á að fylgjast með auglýsingunum sem munu streyma inn á næstunni, og Parísarbúa á að koma með auglýsingar til mín.
Lifið í friði.
ofboðslega
Ofboðslega er leiðinlegt að mæta á opinberar stofnanir. Þessi morgunn fór í að tala við konur sem kunna reglurnar og finnst fólk sem passar ekki inn í formúlurnar gæti allt eins verið holdsveikisjúklingar og stórhættulegt skítapakk.
Ég er hins vegar alls ekki á því að láta svona konur vaða yfir mig því mér finnst það afar óeðlilegt jafnrétti að sumir fái og aðrir ekki og mér er skítsama þó að sumir hafi verið mistök. Hvernig væri að þær sæju að það sem þær telja mistök er einmitt eðlilega afgreiðslan og gefi okkur grænt ljós líka?
Ég skal einhvern tímann útskýra þetta ef ég verð beðin, en ég lofa ykkur að þetta eru tóm leiðindi eins og allt sem maður þarf að fara með í opinberar stofnanir.
Núna ætla ég að fá mér að borða og svo fer ég annað hvort að sofa eða mála. Mér líður ennþá eins og ég sé tussa breidd á klett. Og ég þarf að fara til tannlæknis á eftir. Lífið er ómögulegt í dag. Og ég sem þyrfti að senda nokkra meila, hnýta nokkra hnúta, en það verður að bíða morguns þó að börnin verði heima því auðvitað er aftur allsherjarverkfall.
Annars þarf ég að skrifa um eðlilegt og óeðlilegt jafnrétti sem Hreinn Hjartahlýr veltir upp spurningu um. Í fyrsta lagi má spyrja sig hvað gangi að blaðamanni sem spyr þessa athafnakonu um svona mál. Af hverju í fjandanum er búist við því að hún hafi eitthvað um þetta að segja? Það má spyrja hana um tollskýrslur, litaval og buxnasnið. Það er óréttlátt gagnvart henni að hanka hana á spurningum um femínisma. Það er vissulega alltaf áhugavert að sjá að enn skuli fólk ekki geta skilið þetta orð, að enn skuli það tengjast einhverju ljótu, einhverjum öfgum, einhverju ofur-réttlæti sem byggir á því að konur séu rétthærri en karlar og að karlar séu aumingjar. Það er frekar lamandi, eftir allt sem hefur verið ritað og rætt um þetta og það góða starf sem íslenskir og erlendir femínistar hafa unnið í að upplýsa fólk. En þessi tiltekna kona er sennilega mjög upptekin og situr líklega sjaldan við lestur greina um annað en það sem viðkemur tísku eða verslun og viðskiptum. Og er það mitt að dæma hana fyrir það?
Lifið í friði.
rifin
Mér líður einhvern veginn eins og ég hafi verið rifin í tætlur. Ég er svo fegin að þessi vinnutörn er búin en samt sorgmædd því þarna var svo margt gott fólk sem ég náði bara rétt að tengja við í örstuttar stundir hér og þar og veit að fæsta þeirra mun ég nokkurn tímann sjá aftur. Nema náttúrulega að af því verði að Anaiki verði komið til Íslands. Þessi kór er svoooo góður. Tónleikarnir í gær voru mikil upplifun. Maturinn þeirra var líka dásamlega góður. Verst að hópurinn var ekki alveg búinn undir hráan salinn og sumir nutu kvöldsins ekki sem skyldi vegna þess. Það er náttúrulega alveg magnað hvað allt er alltaf fínt og flott og glansandi á Íslandinu góða. Ég skil það alveg að máluð gólfin og veggir sem eru farnir að láta verulega á sjá geti virkað dálítið sjokkerandi. En það átti kannski ekki að hafa alveg svona mikið að segja, því söngurinn var toppklassi, sem og maturinn og félagsskapurinn. Er það ekki mikilvægara en glitrandi diskókúlur og silkiblóm? Eða er ég bara orðinn plebbi, hippadrusla, afdanka kommi?
Ég er svo þreytt núna að ég sé stundum varir mannsins míns hreyfast og að hann horfir á mig og veit þá að hann er að tala við mig, segja mér eitthvað sem gerðist meðan ég "var í burtu" en ég bara næ samt engan veginn að skilja það sem hann er að segja.
Hlunkaðist nú samt í gegnum ógurlega grein í Le Monde frá föstudeginum um Ísland og skuldir þess sem gætu komið af stað fjármálakreppu í heiminum og hló við fót hugsandi um glæsisalina og flottu sófana og fínu bílana sem verða kannski til þess að skerið fer endanlega á kaf. Er ekki mikilvægara að lifa samkvæmt efnum og njóta lífsins en að skreyta sig og umhverfi sitt með gervifjöðrum? Ég er blúsuð. Ég er mjög blúsuð núna.
Eins gott að það er spennuefni í sjónvarpinu í kvöld. Já, nú er ég farin að geta horft á sjónvarpið á sunnudögum því "FBI Portés disparus" eða "Without a trace" eins og þessir bráðfínu þættir heita víst á frummálinu, eru komnir aftur. Mér finnst Malone alger töffari.
Farin að borða spagettí með sósu.
Lifið í friði.
ferlegt og ekki
Ég var með nýja hugmynd um sérnafn sem viðbót við færslu Ármanns um slíkt en nú er það horfið úr huga mínum. Reyndar er ég tóm enda klukkan að ganga eitt og ég á að vera löngu sofnuð.
Tónleikar á morgun, allir velkomnir enda enn smá pínu húsrúm. Stefnir í stórfínt dæmi, sendiherra og RÚV á svæðinu ásamt VIP liði á borð við mig. Mætið hress. Nánari upplýsingar á parisardaman.com
Fór í útvarpsviðtal í dag. Svo stressuð að ég man ekkert hvað ég sagði. Eitthvað um rómantík og savoir vivre og örugglega fleiri klisjur. Og gleymdi alveg að spyrja fyrir hvaða þátt á hvaða stöð og hvaða dag þessi væntanlega fína auglýsing var... bara ég í hnotskurn... ég er svo þreytt að ég get ekki farið að sofa. Nú er ég farin að sofa. Góða nótt.
Lifið í friði.
